المساعد الشخصي الرقمي

مشاهدة النسخة كاملة : بوابة الموت .. كلمة النهاية .. أسدال الستار



أبو عبد العزيز
07-10-2014, 02:02 PM
النهارده أول ما قمت من النوم لقيت فى الموبيل 5 رنات
من رقم غريب ومتصل الساعة 6 صباحاً أتصلت بيه وسئلته
أنت مين .قلى أنا أبن عمتك والدتى ماتت ربنا يرحمها
والدفن بعد صلاة الظهرلبست هدومى بسرعة ونزلت ركبت ميكرو باص ورحت للمسجد
نصلى عليها
أول حاجه لفتت نظرى أول ما دخلت المسجد أن فى كذا جنازة
وقفت أدام الجنازات لقيت فى نعش محطوط فوقيه
لفه بيضاء صغننه أوى ..بركز كدا عرفت أنه مولود ميت
وشفت واحد بيحضنه بحنان على ما أظن أبوة
صلينا الجنازة ورحنا المقابر علشان ندفن عمتى
دخلت المقابر كانى دخلت عالم تانى ..قصة تانية
بوابة الموت .. كلمة النهاية .. أسدال الستار
الفيلم خلص خلاص ..الاحلام أتقطعت ..الامانى أندثرت
فضلنا ماشين شمال فى يمين فى يمين لغاية ما وصلت
للقبر ..
بصيت تحت كدا لقيت القبر تحت أوى منخفض جدا
المكان موحش جدا حفرة ضيقة كدا بشعه تتحط فيها
بالمقاس وبيتقفل عليك وبيتكب على وشك تراب
ده أنا لما كانت يجى فى أيدى التراب أضايق واجرى
أغسل أيدى .. هيحطو التراب على وشى
شريط الحياة جرى أدام عينى وأنا صغير والشقاوة
واول يوم صليت فيه وأول عيد خدت فيه عيدية واول يوم مدرسة
وأول مره جلدت الكراسة بجلاد ملون واخترت تكت شيك
وكنت فرحان بالشراب الجديد أبو كيس شفاف
وأحتفظت بالشماعة الصغيرة الى جاية معاه
المدرسة الثانوية وأول لحظات دخول الجامعة والشهادة الجامعية
وأول دقة قلب ..وأول لحظة حب .. ولحظات الفراق
وأول مرتب ولحظات النجاح وأول مره عملت فيها
أكونت فيس بوك .. معارفى ..اصدقائى ما قبل حب الالتزام
اخوانى من بعد حب طريق الالتزام..
الدم الموت القهر الثورة كل شئ مر أدام عينى
كل حاجه بتساوى = صفر
كل حاجة ملهاش قيمة هنا كل حاجة لا تساوى أى حاجة
الا طاعة الله
حفرة هيرمو فيها التراب على وشئ ويسبونى لوحدى
يالله لو تأملت فى الامر ..
حسيت بندم شديد أوى على كل انسان ضايقته
حسيت بزعل جامد على كل أنسان حرقتله دمة
حسيت بوجع بسبب ردودى الفجة على أمى
حسيت بضيق بسبب كل انسان نهرته
حسيت بوخزة رهيبه بسبب كل بنت أطلقت بصرى عليها
حسيت بقهر على كل صلاه ضيعتها وكل ذنب أغضبت فيه ربنا
ده مفيش حاجه تساوى والله ..ولا أى حاجه تساوى التكالب
والركض والغل والحقد والحسد والله والله ما تسوى هيكبو
التراب على وشنا ويمشو
ده العمل الصالح ده عامل زى ما تكون دخلت مكان بيمطر
جنيهات ذهب لازم تلم ذكائب ذكائب على قد ما تقدر
لأنك هتدخل خفرة ضيقة أوى بشعه تحت الارض فى مكان
فى غاية الوحشة