النتائج 1 إلى 1 من 1

الموضوع: كيفية عمل قائمة التدفقات النقدية وتاثيرها علي بقيه القوائم الماليه

  1. #1
    المشاركات
    38
    الدولة
    القاهره
    شكراً
    13
    تم شكره 0 مرة في 0 مشاركة

    كيفية عمل قائمة التدفقات النقدية وتاثيرها علي بقيه القوائم الماليه

    تعتبر قائمة التدفقات النقدية قائمة من ضمن القوائم الماليه التي تعدها الشركه عن كل فتره ماليه وتعتبر هذه القائمة مهمه زى باقى القوائم الماليه هنشوف مع بعض بنود قائمة التدفقات النقدية والهدف من القائمه وازاى نعمل تحليل ليها وازاى نعرف نقرا القائمه بشكل كويس، كلنا عارفين ان قائمه الدخل مبنية على أساس الاستحقاق وهو انه بيسجل عنده اى ايراد او اى مصروف يخص الفترة سواء كان دفعه او لسه لم يتم دفعه ، بمعنى ايجار شهر يونيو للمكتب الإداري للشركة 10000 وشهر يونيو خلص والشركه لسه مدفعتش الايجار هتدفعه فى شهر يوليه، الشركه بتعمل قيد استحقاق شهرى فى شهر يونيه للايجار إلى عليها.
    نموذج قائمة التدفقات النقديه

    بالرغم انها هتدفع الايجار فى شهر يوليه ، ونفس الكلام فى حالة الإيرادات الشركه تعترف بالإيراد حتى لو لسه الايجار ده لم يتم تحصيله هى دى فكره أساس الاستحقاق، العكس بقى فى قائمة التدفقات النقدية مبنية على الأساس النقدي يعنى العبره عنها بالمدفوعات او التحصيل النقدى فقط واى مصروف او ايراد غير، نقدى يتم استبعاده وعمل تسويات على البنود دى، يبقى دى اول حاجه لاز نعرفها عن قائمه التدفقات النقديه، اعداد القائمة سهل ولكن الاهم ازاى نعرف نعمل تحليل للقائمه وربطها بالقوائم المالية الاخرى وازاى اعرف المشكله فين بالظبط .
    اهميه و فائده قائمه التدفقات النقديه

    قائمه التدفقات النقديه ليها اهداف كتيرة زى انها بتقولى لو انا مثلا كشركة قائمة الدخل بتاعتى فيها ارباح مليون جنيه وفى نهاية الفترة مثلا لقيت النقدية عندى فى المركز المالى 150 الف مثلا عايزين نعرف الفرق بين رقم الربحية ورقم السيولة وهل الرقم ناتج عن سبب طبيعى ولا الفرق ده ناتج عن مشاكل وسوء إدارة.
    الفرق بين رقم الربحية ورقم السيوله

    قائمه التدفقات النقديه بتجاوب لينا بشكل مبدئى على السؤال ده عن طريق انها توضح صافي النقدية الناتجة من النشاط التشغيلي والنشاط الاستثماري النشاط التمويلي .ثم نبدا بكل نشاط ونبدا نعمل تحليل لكل بند من البنود ونشوفها هل فى قصور وخلل مقارنة بالارقام المرتبطة بها فى القوائم المالية الاخرى، فالفرق بين رقم الربحية ورقم السيولة مش مقياس أنه الاداره جيده او سيئه بل لازم زى ماقولنا التحليل المالى هو الى يجاوب على السؤال ده ، ممكن مثلا الشركه تبقى عامله خسائر فى قائمه الدخل وفى نفس الوقت فى نقدية عالية ده ممكن يكون من أسبابه بيع الاصول وان الشركه بتصفى او خدت قرض فى نهايه الفتره الماليه.
    التحليل المالى للقوائم الماليه

    ولما الشركه تتعرض لمشاكل فى السيولة خلال الفترات المالية، ومشاكل فى سداد التزاماتها الموردين والدائنين ورواتب الموظفين قائمه التدفقات النقديه بتجاوب لينا على السؤال ده وهو أسباب حدوث أزمات في السيولة وهو ما يسمى بتقييم السياسة الائتمانية بالشركة و تقييم عمليات البيع والشراء بصفة عامة والأجل منها بصفة خاصة .قائمه التدفقات النقديه من القوائم المالية اللى البنوك والمؤسسات المالية والاستثمارية بتهتم بيها جدا على مستوى كل الانشطة (التشغيلية او الاستثمارية أو التمويليه) وبالخصوص الانشطة التشغيلية علشان عايز تشوف صافى التدفقات النقدية من الانشطة التشغيلية جيد واسباب ارتفاعه او انخفاضه علشان تقدر تشوف قدرة الشركة على سداد القروض والفوائد وقدرتها على أساس توزيعات الأرباح .
    كيفية عمل قائمة التدفقات النقديه

    طبعا التحليل يتم على فترات زمنيه مختلفه للحكم بشكل موثوق وجيد، يبقى كده فهمناأهمية قائمة التدفقات النقدية ودورها في الحكم على كفاءة السيولة وجودة الأرباح التشغيلية وقدرة الشركة على سداد التزاماتها بشكل جيد ام لا.عايزين نتعرف قائمه التدفقات النقديه ونبدا نشوف ازاى نعملها وتطلع معانا صح ،لازم نكون عارفين القائمة والبنود التي تتكون منها.اولا: لازم نكون عارفين انه الرقم النهائى فى قائمه التدفقات النقديه وهو صافى رصيد النقدية فى اخر الفتره لازم يكون هو نفس الرقم الى موجود معانا فى قائمة المركز المالى وهو رقم النقدية ضمن الاصول المتداوله .لازم نكون عارفين حاجات مهمه عن قائمه التدفقات النقديه .
    تتكون قائمة التدفقات النقديه من 3 أنشطة رئيسة يندرج تحتها مجموعة من البنود

    النشاط الأول: هى صافى التدفقات النقدية من الأنشطة التشغيلية.

    وهى الحسابات الخاصة بعمليات التشغيل فى الشركه زى حسابات العملاء والمخازن والموردين و الارصده المدينه الاخرى والارصدة الدائنة الاخرى ومدفوعات ضريبة الدخل .النشاط الثاني: وهو صافى التدفقات النقدية من الأنشطة الاستثمارية .وهى الحسابات الخاصة ببيع أو شراء الأصول الثابتة والاستثمارات في الشركات الشقيقة والاستثمارات المتاحة للبيع .النشاط الثالث: وهو صافى التدفقات النقدية من الأنشطة التمويلية .وهى الحسابات الخاصة بالتمويل بالشركة سواء تمويل داخلي عن طريق إصدار الشركة لأسهم أو عن طريق التمويل الخارجى بالقروض والتسهيلات .
    قائمه التدفقات النقديه ليها شكلين فى العرض

    وهى الطريقة المباشرة و الطريقة الغير مباشرة

    رقم صافى التدفقات النقدية فى نهاية الفترة هيكون واحد مفيش اختلاف، الاختلاف بينهم في طريقة عرض البنود التشغيلية إنما النشاط الاستثمارى والنشاط التمويلى نفس طريق العرض فى الطريقه المباشره والغير مباشره.النشاط التشغيلي هو الى فيه اختلاف فى طريقة العرض بمعنى؛ الطريقة المباشرة فكرتها انه بيشوف كل بند من بنود الانشطة التشغيلية يحسب لها قيمة قائمة التدفقات النقدية بمعنى يشوف المتحصلات من العملاء كام والمدفوعات للموردين كام وهكذا فى كل بند، وبعد كده يبدأ فى النشاط الاستثمارى والنشاط التمويلى.
    امثله على قائمة التدفقات النقديه

    طيب لو انت اشتغلت بالطريقه المباشره فانت لازم تيجى تعمل فى الإيضاحات المتممة للقوائم المالية تسوية بين رقم صافى الربح قبل الضريبة فى قائمة الدخل و رقم صافى التدفقات النقدية في نهاية الفترة، انما لو اشتغلت بالطريقه الغير المباشرة وهى الطريقة التى فى الغالب يتم استخدامها عند اعداد القوائم الماليهوهى انك تبدا من رقم صافي الربح قبل الضريبة وتبدأ تعمل عليه تسويات خاصة بالمصروفات والإيرادات الغير نقدية، وبعد كده تبدأ تحسب بنود الأنشطة التشغيلية عن طريق حساب التغير فى كل بند من البنود فى الفتره الماليه الحاليه ونبدا نشوف هل التغير ده كان تدفق نقدى داخلى ولا تدفق نقدى خارجى .وفى النهايه رقم صافى التدفقات النقدية من الأنشطة التشغيلية هيكون واحد فى الطريقتين، بس طبعا لو اشتغلت بالطريقه المباشره فانت مش محتاج تعمل ايضاح فى القوائم المالية عكس الطريقة المباشرة .فى الحلقه الثانية هنبدا ناخد الطريقتين ونشوف ازاى نحسبصافى التدفقات النقدية فى كل بند من بنود الأنشطة الثلاثة

    https://www.youtube.com/watch?v=AU5M5Kr7MsY&feature=youtu.be

    للمزيد

    لمتابعتنا علي:
    يوتيوب
    فيسبوك
    التعديل الأخير تم بواسطة مصطفى كمال ; 11-06-2019 الساعة 01:56 PM


موضوعات ذات علاقة
برنامج متكامل : دليل حسابات - يومية امريكية - ميزان - استاذ - قائمة الدخل - تحليلي الحسابات- الميزانية - قائمة التدفقات النقدية
القائمة الرئيسية للبرنامج وتشمل : دليل الحسابات اليومية الامريكية ميزان المراجعة استاذ عام قائمة الدخل تحليلي الحسابات الميزانية قائمة... (مشاركات: 43)

قائمة التدفقات النقدية.
الطريقة المباشرة: المتحصلات النقدية عن الأنشطة التشغيلية = المبيعات + المدينين أول الفترة – المدينين آخر الفترة – مدفوعات مقابل بضاعة = تكلفة... (مشاركات: 0)

شرح قائمة التدفقات النقدية
تعد قائمة التدفقات النقدية على الاساس النقدى (يعنى يهتم بما قبض وما دفع فعلا بغض النظر ان كان يخص الفترة ام لا ) ============== قائمة الدخل والمركز... (مشاركات: 0)

قائمة التدفقات النقدية
قائمة التدفقات النقدية (Cash Flow Statements ) تعتبر قائمة التدفقات النقدية هي القائمة الثالثة بعد كل من قائمة المركز المالي (الميزانية العمومية... (مشاركات: 0)

قائمة التدفقات النقدية
إن الهدف الرئيسي من إعداد قائمة التدفقات النقدية هوتزويد مستخدمي البيانات الحسابية بمعلومات عن النقد المستلم والنقد المدفوع خلالالفترة المالية ،... (مشاركات: 1)

أحدث المرفقات
الكلمات الدلالية
لا يوجد