خطاب الضمان




خطابات الضمان هى مبلغ تامين نودعه فى البنك ( نظريا ) لحساب المالك لضمان جديه التعامل وحسن التنفيذ ولا يحق للمالك ان يصرفه كله او جزء منه الا فى حاله عدم تنفيذنا الاعمال الموكله الينا بالصوره المنصوص عليها فى العقد وهناك نوعين من خطاب الضمان هما :


1. خطاب ضمان ابتدائى : وده بيقدم عند دخول المناقصه وبيرد لينا لو لم ترسى علينا المناقصه.
2. خطاب ضمان نهائى : وده بيقدم عند رسوالمناقصه علينا وبيرد لينا بعد التسليم النهائى للمشروع .وبدون كلام كتير تعالى ناخد مثال عملى سريع ...


مثال : قدمت شركه الهاشم مناقصه لبناء برج بقيمه 10 م جنيه ولدخول المناقصه لازم خطاب ابتدائى بقيمه 1% من العقد والخطاب النهائى ب 10 % من العقد والدفعه المقدمه مليون جنيه ,, اما البنك فبياخد على الخطاب الابتدائى غطاء 10% وعموله 3فى الالف لكل 3 شهور ومصاريف 100 جنيه اما الخطاب النهائى بياخد عليه غطاء 25 % وعموله 6 فى الالف ومصاريف 600 جنيه للسنه .اشتغل بقا ,,,


الحل :اولا نفهم ان الغطاء ده مبلغ البنك بيخصمه من حسابنا وبيكمل الباقى من عنده علشان كده بياخد عموله ومصاريف يعنى بياخد مننا 10% وبيكمل 90 % من الابتدائى وكذلك الحال فى النهائى ولو ان النسبه اكبر لان المبلغ اكبر . تعالى بقا نطلع المعلومات علشان نحل المثال .
بالنسبه للمقاوله : قيمه المقاوله 10 مليون , الدفعه المقدمه مليون , الابتدائى =1% , والنهائى = 10% .
بالنسبه للبنك :ابتدائى: غطاء = 10% وعموله 3/1000 ربع سنوى , مصاريف 100 للفتره .
نهائى : غطاء = 25% وعموله 6/1000 سنوى , مصاريف 600 سنوى .


خلاص طلعنا المعلومات تعالى نشتغل بقا يا برنس ....,,,,,


قيمه الخطاب الابتدائى = 1% من المقاوله = 1% × 10م = 100000 ,
قيمه الخطاب النهائى = 10% من المقاوله = 10% × 10 م= 1 مليون ,
غطاء للابتدائى = 100000× 10% = 10000 ج ,غطاء للنهائى = 1م × 25% = 250000 ج ,
العمولات البنكيه : الابتدائى : عموله 3/1000 من قيمه الخطاب = 100000×3/1000 = 300 ج
العمولات البنكيه : النهائى : عموله 6/1000 من قيمه الخطاب = 1000000×6/1000 = 6000 ج
المصاريف البنكيه : ابتدائى : العموله 100 جنيه للفتره ( 3 شهور ) وغالبا يكون مدته كده ولا تزيد بس احنا هنزودها علشان نعرف المعالجه بتكون ازاى لما نمدد خطاب الضمان .
المصاريف البنكيه : نهائى :600 لكل سنه .وتجدد فى الميعاد .


بعد ما طلعنا المعلومات تعالى نشوف قيود اليومية ,,,,,


1 – عند عمل وتقديم خطاب الضمان الابتدائى


من مذكورين
10000ح/ غطاء خطاب الضمان
300ح/عموله خطاب الضمان
100ح/مصاريف بنكيه – خطابات ضمان
10400الى ح / البنك
عمل خطاب الضمان من البنك وتقديمه الى المناقصه وممكن المناقصه لا ترسو علينا وده نشوفو تحت . وممكن نحمل العمولات والمصاريف على م عموميه علطول بدل ما نفتح حسابين مصاريف وعمولات


2 – لو لم ترسو علينا المناقصه بيرد اينا الغطاء والباقى بيدخل مصاريف عموميه واداريه عادى جدا


10000من ح / البنك
10000الى ح / غطاء خطابات ضمان
رد قيمه خطاب الضمان من البنك بعد استلام الخطاب من الجهه المقدم اليها وتسليمه للبنك والغاؤه .


3 – عند رسو المناقصه علينا بنستلم الخطاب الابتدائى ونقدم خطاب نهائى بس الاول نقفل العمولات فى م عمليات نفتحها باسم المشروع وبعدين نعمل ونقدم الخطاب النهائى علشان ناخد الدفعه المقدمه والخطوات كالتالى ؛


400من ح / م عمليات – الهاشم
الى مذكورين
300ح/ عموله خطابات ضمان
100ح/مصاريف
بنحمل مشروع الهاشم ( مركز تكلفه ) بالمصاريف اللى كنا حملناها عموميه علشان نقفلها. ودى اول خطوه فى المشروع


4 – بنرد الخطاب الابتدائى للبنك ونسترد قيمته .


10000من ح / البنك
10000الى ح / خطابات ضمان
ردينا الخطاب الابتدائى واخدنا قيمته من البنك عادى جدااا


5 – نفتح خطاب نهائى علشان نسلمه للمشروع ويعتمد ونبداء الشغل .


من مذكورين
250000ح/غطاء خطابات ضمان نهائيه – الهاشم
6000ح/م عمليات الهاشم – عمولات بنكيه
600ح/ م عمليات الهاشم – م بنكيه
256600الى ح/ البنك
فتحنا خطاب ضمان نهائى وخلى بالك اننا علينا على م عمليات العملات والمصاريف البنكيه علطوووول .


6 - ممكن البنك لما ياخد اخطاب الابتدائى يعمل النهائى علطول وتبقى الخطوه كده


من مذكورين
250000ح/غطاء خطابات ضمان نهائيه – الهاشم
6000ح/م عمليات- الهاشم – عمولات بنكيه
600ح/ م عمليات- الهاشم – م بنكيه
الى مذكورين
10000ح/غطاء خطاب ابتدائى
246600ح/بنك
يعنى البنك خصم قيمه الابتدائى ولم يرده للحساب وكمل الباقى يعنى خطوه واحده مش اتنين وده بيعتمد على المعالجه اللى بتوصل لينا من البنك وعلى ضوئها بنشتغل . يعنى خطوه او اتنين مش فارقه هى هى نفس النتيجه المهم اننا نكون مفتحين .


7 بعد ما خلاص عملنا الخطاب النهائى وسلمناه للعميل بناخد دفعه مقدمه من العميل علشان نبداء شغل


1000000من ح / البنك
1000000الى ح / دفعه مقدمه – الهاشم
استلام الدفعه المقدمه من العميل ونفتح لها حساب لوحده لانها بتستهلك من خلال المستخلصات زى ما هنشوف ,,,
كده عرفنا ازاى بنعمل الخطابات الابتدائى والنهائى وبنقدمهم ومعامله البنك واخدنا الدفعه المقدمه ,,,