النتائج 1 إلى 1 من 1

الموضوع: كل شئ عن الأصول الثابتة

  1. #1
    الصورة الرمزية محاسب متخصص
    محاسب متخصص غير متواجد حالياً مشرف عام
    المشاركات
    2,654
    شكراً
    1
    تم شكره 72 مرة في 62 مشاركة

    كل شئ عن الأصول الثابتة

    1. اصول ثابته : وهى الموجودات التى تملكها المنشاه بغرض المساعده فى عمليات الانتاج وليس بغرض اعاده البيع وغالبا تستمر مع المنشاه عده سنوات , و يفتح لها حسابات فرعيه وتقسم بدورها الى حسابات جزئيه منها الات والمعدات والسيارات والمبانى والاراضى والاثاث والمفروشات ,,,,,
    2. تكلفه اقتناء الاصل : بيقولك بقا يا بروف ان تكلفه اقتناء الاصل دى هى كل التكاليف و المصروفات اللى انا بدفعها و اصرفها لحد ما الاصل يتركب و يبداء فى الانتاجى الفعلى .... يعنى ايه ؟؟؟؟ يعنى انا لو هشترى اله معينه من اسكندريه ب 100 الف و العربيه اللى هتجيبها لحد المصنع و النش اللى هينزلها هياخدو 5000 جنيه و الاله دى عاوزه قاعده خرسانيه علشان تركب عليها تتكلف 4000 جنيه و كمان عاوزه شويه حركات كده و بلابلابلا ب 1000 جنيه و جبت واحد مهندس متخصص يعمل تجارب و حركات علشان يشغل الاله دى و يسنجف لى الدنيا هياخد 5000 جنيه و عاوزه وصله كهرباء و بلابلا ب 1000 جنيه ............ هلاقى فى الاخر ان تكلفه اقتناء الاصل ده 116 الف و ده اللى انا كمان هسجلو عندى = قيمه الاصل
    3. م . الاهلاك : ( مصروف الاهلاك ) المصروف ده هوا هوا قسط الاهلاك اللى بيحسب للسنه و بيحمل كمصروف علشان يحمل فى قائمه الدخل ,, و من الاخطاء الشائعه ان الناس بتحط المصروف ده مع المصروف الادارى و العمومى و انا من مكانى هذا اقول خطاء شائع ,, لانه بيتحط لوحده خالص تحت اسم مصروف الاهلاك او الاهلاك او اهلاكات ( اى اسم يوضح طبيعه المصروف – المهم انه يكون مستقل ) . و هنشوف الحوار ده فى حته لاحقه او ارجع اليه فى كتاباتى السابقه .
    4. مجمع الاهلاك : وده برضو اللى انا باخده من قسط الاهلاك بس ده بقا بقول عليه مجمع الاهلاك و ده بيروح الميزانيه علشان بيخصم من الاصول الثابته ( كل مجمع يخصم من الاصل بتاعه ) و برضو من الاخطاء الشائعه الناس اللى بتح الاصول الثابته بالصافى و لكن الاصح انى بحط التكلفه الدفتريه للاصل مخصوم منها مجمع الاهلاك ولو عاوز احط الصافى فى الميزانيه يبقى لازم اعمل جدول ايضاحى للاصول الثابته و اهلاكها و برضو يرجى الرجوع الى كتابى السابق – القوائم الماليه فى ضوء المعايير ,,,
    كفايه رغى نظرى كده و تعالى بقا نشوف ايه حوار الاصول الثابته ده اللى بيلخبط ناس كتير مع انه سهل جدااااا و لزيز و كميل كته يا اخوتى هع هع هع هع ,,,,
    يعنى هنشوف الاصل ده من اول ما اشتريه لحد ما اموته ( اهلكه تماما) او ابيعه او ارميه فى الشارع حتى ..
    اولا : شراء الاصول الثابته ,,
    ( أ ) تعالى نشوف انا لما بشترى اصل نقدا بيكون المعالجه ازاى ؟؟؟؟ و بفرض ان الاصل = 300 الف جنيه , و انا اشتريته بشيك ( نفس معالجه النقدى )
    300 من ح \ الاصول الثابته
    - الات و معدات \ مولد كهرباء ستانفورد 350 المانى .
    300 الى ح \ بنك الرياض
    - شيك رقم 256 لامر شركه الراجحى للمعدات
    طيب ..,,, دى المعالجه البسيطه للاصل و الطريقه التقليديه اللى بتتبع ,,,,,
    ( ب ) بفرض انى اشتريت الاصل ده من شركه الراجحى بس هدفع على 4 دفعات متساويه هعمل ايه ؟؟
    سهله اوى يا مان و يا وومان ,,, اول ما اشترى الاصل ده و ادفع الدفعه الاولى هثبت الاصل عندى مدين طبعا .. و اثبت الراجحى دائن فى حساب اسمه \ دائنو شراء اصول ثابته ,,كده يعنى
    300 من ح \ اصول ثابته
    - الات و معدات \ مولد كهرباء ستانفورد 350 المانى .
    الى مذكورين
    220 ح \ دائنو شراء اصول ثابته
    - شركه الراجحى للمعدات ,,
    75 ح \ بنك الرياض
    - شيك رقم 555 لامر شركه الراجحى للمعدات
    و كل ما ادفع دفعه بعمل قيد اخفض بيه دائنو شراء الاصول طبعا .. و بما ان ده حساب طبيعته دائن يبقى انا لازم اخليه مدين علشان اقلل الحساب ده ...و القيد تماما كده ,,,
    75 من ح \ دائنو شراء اصول ثابته
    - شركه الراجحى للمعادت
    75 الى ح \ بنك الرياض
    شيك رقم 566 لامر شركه الراجحى للمعدات
    طيب تعالى نشوف كده حساب الاستاذ الجزئى ده عامل ازاى بعد الاربع دفعات ...
    ح \ شركه الراجحى للمعدات ,,
    التاريخ بيان مدين دائن رصيد
    ح \ الاصول الثابته 225 225
    ح \ البنك 75 159
    ح \ البنك 75 75
    ح \ البنك 75 00
    الرصيد 227 227 00


    كده شفنا اننا اثبتنا الاصول فى الاول ودفعنا كل الدفعات الباقيه و قفلنا حسابه و كل عام وانتم بخير ,,
    و عاوز ابين كمان انا ازاى بفتح الحسابات دى فى الدليل علشان اللى مش عارف اهو يعرف :
    الحساب الرئيسى : الخصوم الحساب الفرعى : خصوم متداوله
    الحاسب الجزئى : دائنو شراء اصول ثابته
    n تحت الحساب ده بقا بنفتح صفحه لكل واحد زى الموردين تماما بتتبع نفس الترتيب كده ,,
    ( ج ) حاله كمان هى انى حصلت على الاصل ده عن طريق الهبه او المنحه من شخص ما او جهة ما , يعنى انا لم ادفع فيه ولا قرش ,,, اثبته ازاى ؟؟؟؟؟ طبعا يا باشا فى راس المال عدل ل ل ل ل
    300 من ح \ الاصول الثابته
    - الات و معدات \ مولد كهرباء ......
    300 الى ح \ راس المال
    طيب بفرض ان هناك 3 شركاء ,,,,, عادى جدا اقسم الاصل عليهم
    300 من ح \ الاصول الثابته
    - الات و معدات \ مولد كهرباء ......
    300 الى ح \ راس المال
    100 – راس مال الشريك أ
    100 – راس مال الشريك ب
    100 – راس مال الشريك ج
    كده انا عليت الاصول ب 300 الف و حسبت كل واحد حصه متساويه بفرض انهم متساويين اصلا فى الحصص بتاعتهم الى دفعينها فى راس المال او يقسم على اساس حصه كل واحد منهم او على حسب الاتفاق
    ( د ) هناك حوار كمان ,,, لو انا اشتريت اصل و دفعت ثمنه بس لسه مش جه لحد عندى ,,,,
    مثلا انا اشتريت معده و اتفقت مع الشركه انى هدفع دفعه 200 الف عند التعاقد و من ثم 200 الف عند تجهيز الاصل ثم 240 الف عند التركيب ثم 100 بعد التجربه و العمل ... هنعمل ايه ؟؟
    فى ناس قالو اننا نثبت الكلام ده فى ح \ دائنو شراء اصول ثابته ..,,, و نعلى الدفع و لما يجى الاصل نقفله مع حسابهم و نثبت الاصل ,,, انا قول غلط و مش موافق مع احترامى ليهم بلان اصل الحساب ده دائن و اسمه دائنو ,,,, يبقى الاولى انى مش اسجل اول 3 دفعات مدينه لانه كده هيدينى رصيد الحساب شاذ .
    فى ناس تانى قالو اننا نحط الحساب ده فى حسابات مدينه تحت التسويه ,,,او مدينى شراء اصول ثابته ,,
    وانا اعترض معاهم مع كامل احترامى ليهم لان الحساب ده هيدخل متداول وانا شارى اصل ثابت و كمان مدينه ده اجه هسهس كده وانا مش موافق و خلاص وانا حر ,,, هع هع هع
    ناس تالت قالو احنا بقا نوسط حساب اسمه \ انفاق ( او تكوين ) استثمارى ( والاتنين قريبين اوى من بعض) وانا موافق على الراى ده ,,,, و هنثبت الكلام ده كده تحديدا ,,و هنشوف اثره ,,
    اول ما ادفع الدفعه المقدمه
    200 من ح \ انفاق استثمارى
    - شركه الرافعه البرجيه الحديثه (دفعه مقدمه لشراء رافعه برجيه \ 30 طن – كات )
    200 الى ح \ البنك الاهلى
    - شيك رقم .... لامر .....
    اول ما ادفع الدفعه الثانيه
    200 من ح \ انفاق استثمارى
    - شركه الرافعه البرجيه الحديثه (دفعه ثانيه لشراء رافعه برجيه \ 30 طن – كات )
    200 الى ح \ البنك الاهلى
    شيك رقم .... لامر .....
    اول ما ادفع الدفعه الثالثه عند وصول الاصل و التركيب .
    240 من ح \ انفاق استثمارى
    - شركه الرافعه البرجيه الحديثه (دفعه ثالثه لشراء رافعه برجيه \ 30 طن – كات )
    240 الى ح \ البنك الاهلى
    شيك رقم .... لامر .....
    خلى بالك انا لحد دلوقتى لم تصلنى الفاتوره بتاع الاصل ولم اثبته اصلا الا بعد التركيب الكامل و التجربه والعمل و بنستلم الاصل كلما و ندفع الباقى 100 الف و نثبت الاصل عندى كالتالى ,,,
    740 من ح \ الاصول الثابته
    - الات و معدات \ رافعه برجيه كات – 30 طن
    الى مذكورين
    640 ح \ انفاق استثمارى
    - شركه الرافعه البرجيه الحديثه
    100 ح \ البنك الاهلى
    - شيك رقم .... لامر ....
    و ممكن انى اوصل الدفعه 100 الف للشركه الاول و بعدين اثبت الاصل و الاتنين عادى يا برنس
    كده انا اثبت الاصل و قفلت حساب الشركه و تعالى نشوف مكانه فى الدليل :
    الاصول >> الاصول الثابته >> انفاق استثمارى >> شركه كذا كذا كذا
    ده من اكتر الاسباب الى خلتنى مقتنع بيه بدلا من مدينى و بتاع .. لان الحساب ده طبقا للدليل المحاسبى الموحد مكانه فى الاصول الثابته تحت كل انواع الاصول الثابته ,,وتعالى نشوف كده حاسبه الفرعى فى الاستاذ ..
    ح \ شركه الرافعه البرجيه الحديثه



    يمكنكم تحميل الملف بالكامل من المرفقات
    الملفات المرفقة


موضوعات ذات علاقة
جرد الأصول الثابتة
: تتناقص قيمة الأصل الثابت بقيمة الاستخدام أو التقادم خلال السنوات ويسمى هذا التناقص بالاستهلاك: الاستهلاك: هو توزيع تكلفة الأصل بطريقة منظمة... (مشاركات: 0)

معيار رقم 10 الأصول الثابتة
اولا مقدمة المعيار 1- هدف المعيار 2- نطاق المعيار 3- التعريفات ثانيا الاعتراف بالاصول الثابتة 1- التكاليف الاولية 2- النفقات اللاحقة... (مشاركات: 0)

إدارة الأصول الثابتة
إدارة الأصول الثابتة : تمثل الأصول الثابتة الشق الثانى من إجمالى الأصول للمنشأة ، وقد تناول الفصل شرحا لإدارة الأصول المتداولة وعناصرها المختلفة... (مشاركات: 0)

كيف يتم جرد الأصول الثابتة ؟
جرد الأصول الثابتة: تتناقص قيمة الأصل الثابت بقيمة الاستخدام أو التقادم خلال السنوات ويسمى هذا التناقص بالاستهلاك: الاستهلاك / الاهلاك :... (مشاركات: 0)

جرد الأصول الثابتة
جرد الأصول الثابتة: تتناقص قيمة الأصل الثابت بقيمة الاستخدام أو التقادم خلال السنوات ويسمى هذا التناقص بالاستهلاك: الاستهلاك / الاهلاك... (مشاركات: 0)

أحدث المرفقات
الكلمات الدلالية